Hazrat Muhammad Murad Ali Khan Rahmatullah Alayh

Hazrat Muhammad Zahid

 

Rahmatullah Alayh

 

Aap Bukhara ke ilaqa Hisaar ki nawahi bastii Wakhsh mein 14 Shawaal 856  bmtabq 1448 eswi  ko is dunya e  danni mein peda hue. Aap ke waldain sahib e taqwa Aur buzurag insaan thay. Isi liye Hazrat Khwaja Muhammad Zahid Rahmatullah Alayh  ki tabiyat mubarak ibtida se hi darweshana rahi .

 

 

 

 

 

 

 

 

 

 

 

 

 

Ibtidayi taleem ap ne waalid e majid se hi haasil ki. Chunkay aap Hazrat Khwaja Yaqoob Charkhi Rahmatullah Alayh ke nawasa hain, is liye aap ne tareqat ke ibtidayi  asbaaq yani zikar ki taleen aap ke kisi khalifa se haasil ki thi. Bawajood koshish ke un kaam naam maloom nah ho saka. Is ke baad aap riyazat o mujahida mein mashgool hogaye .

Aap ke andar anwaraat e elahia ko jazb karne ki be panah qowat peda ho gayi thi. Isi douran aap ke kaan mein Hazrat Khwaja Abaidullah AherarRahmatullah Alayh ke faiz ka awaaza pouncha to aap ne Hisaar se Samerqand ki taraf  rakhat e safar baandha. Wahan pahonch kar aap muhalla Wasaray mein qiyam pazeer hue. Yahan se Hazrat Khwaja Abaidullah Aherar Rahmatullah Alayh ki khanqah alia tqriban  chay (6) meel ke faaslay par thi .

Hazrat Khwaja Abaidullah Aherar Rahmatullah Alayh ko bazarea kashaf maloom howa kay Hazrat Molana Muhammad Zahid Rahmatullah Alayh hamari mulaqaat ke liye a aa rehay hain to aap ne dil mein iradah farmaya kay hamein agay jaakar un ka istaqbaal karna chahiye. Halaank sakht  garmi par rahi thi aur dopehar ka waqt tha. Aap ne apne khadmeen se farmaya hamari sawari ka uont lao aur aap is par sawaar hue aur murideen ko sath le kar chal parre .

Kisi ko majaal nahi thi kay istafsaar karta kay Hazrat is waqt sakht garmi ke aalam mein kahan tashreef  le ja rahay hain. Aap ne bhi uont ko is ke haal par chhor dya kay jahan chahay chala jaye. Bil akhir uont muhalla Wasaray mein Hazrat Khwaja Muhammad  Zahid Rahmatullah Alayh ki qiyam gaah ke samnay tehar gaya. Aap uont se utre, isi asna mein Hazrat Khwaja Muhammad Zahid Rahmatullah Alayh ko bhi maloom ho gaya kay Hazrat  Khwaja Abaidullah Aherar Rahmatullah Alayh tashreef  laaye hain. Aap beikhtiyaar doray aaye aur Hazrat Rahmatullah Alayh ka istaqbaal kya aur aap ki pabosi ka sharf haasil kya. Is ke baad aap Hazrat Rahmatullah Alayh  ko saath le kar andar  tashreef  le gaye aur khalwat mein jaa kar apne waardaat o mamlaat o maqamat Hazrat Khwaja Abaidullah Aherar Rahmatullah Alayh  ki khidmat mein gosh guzar kar diye aur baet honay ki khwahish ka izhaar farmaya. Hazrat Khwaja Rahmatullah Alayh  ne aap ko isi waqt baet farma lia  aur isi majlis mein aap par aisi tawajah farmai kay tamam manazil tay aur takmeel ke darja tak pohancha diya aur sath hi Khilafat aata karkay aap ko wahein se rukhsat bhi inayat farma de. Yeh dekh kar Hazrat Rahmatullah Alayh  ke baaz murideen atash e  hasrat mein beikhtiyaar Hazoor ki khidmat mein arz guzar hue kay hamein kayi baras ho gaye khidmat bja late hue, lekin aisi meharbani nahi hui jaisi kay aap ne Hazrat Molana Zahid Rahmatullah Alayh  par farmai kay pehli sohbat mein hi nawaz dia  . Asp Rahmatullah Alayh  ne farmaya kay Molana  Zahid Rahmatullah Alayh , chairag, tail aur batii tayyar kar kay hamaray paas aaye thay, hum ne sirf  roshan kar kay rukhsat kar diya .

Allah allah ! Khudawand quddoos ne apne pyare bundon ko kya qowat aur istedad aata farmai hai. Yeh waqea Hazrat Khwaja Aherar Rahmatullah Alayh ke azeem tasarruf  aur Hazrat Khwaja Molana Zahid Rahmatullah Alayh ke kamaal istedad o qabliyat par dalalat karta hai .

Hazrat Khwaja Abaidullah Aherar Rahmatullah Alayh  ne deen ki taraqqi o tarweej ke liye be panah kaam kya aur apne baad apne khulfa ko chorra taakay yeh mission jari o saari rahay. Aap ke khulfa mein sab se barray aur muazzam Khalifa Hazrat Khwaja Muhammad  Zahid Wakhsi hain

Hazrat Khwaja Muhammad Zahid Rahmatullah Alayh ne ijazat ke baad tableegh par kamar kis li aur deen ki ashaat mein bharpoor hissa liya aur aik duniya ne aap se faiz haasil kya aur maqamat o kamalaat ke darjaat tay kiye. Aap Hazrat Khwaja Aherar Rahmatullah Alayh ke khalifa azam thay aur aloom zahir o batin ke sath sath fuqr o tajreed aur toheed o mein mqamat e alia par faiz thay .

Aap ke halaat bawajood talaash  e bisyaar ke ziyada nah mil sakay. Aap yakam rabiey al-awwal 936 Hijri  bmtabq 1529 eswi ko Wakhsh mein hi wasil bahaq hue aur wahein par aap ka mazaar hai, jahan se log fayooz o barkaat haasil karte hain .